Oifigear Slàinte is Sàbhailteachd

Tha Sabhal Mòr Ostaig a’ sireadh Oifigear Slàinte is Sàbhailteachd pàirt-thìde airson obair a mhaireas 12 mìos sa chiad dol a-mach gus ar cuideachadh le bhith a’ stèidheachadh is a’ cur mhodhan-obrach èifeachdach an sàs a thaobh slàinte is sàbhailteachd air feadh na h-àrainn Ghàidhlig shònraichte a th’ againn aig a’ Cholaiste.

Mar phàirt dhen dreuchd agaibh bidh sibh a’ dealbh agus a’ cur phoileasaidhean slàinte is sàbhailteachd an sàs, a’ dèanamh sgrùdaidhean, a’ toirt comhairle do luchd-obrach is oileanaich, agus a’ brosnachadh dhaoine gu bhith sàbhailte air feadh na Colaiste. Bidh eòlas-obrach freagarrach agaibh, agus eòlas math air reachdas, agus bidh co-dhiù Teisteanas Slàinte is Sàbhailteachd L3 agaibh no teisteanas NEBOSH, agus bhiodh e fìor mhath nam biodh sibh eòlach air a bhith ag obair ann an roinn an fhoghlaim no san roinn phoblaich. Seo dreuchd chudromach do chuideigin a tha dealasach mun obair a tha an lùib a bhith a’ cruthachadh àrainneachd shàbhailte is thaiceil dhan a h-uile duine.