Oifigear Conaltraidh

OIFIGEAR CONALTRAIDH

Faclair na Gàidhlig

’S e iomairt nàiseanta, eadar-oilthighe a tha ann am Faclair na Gàidhlig air a stiùireadh le Sabhal Mòr Ostaig – Ionad Nàiseanta Cànan is Cultar na Gàidhlig – airson faclair eachdraidheil a chruthachadh do Ghàidhlig na h-Alba coltach riuthasan a tha ann mar-thà do dh’Albais agus do Bheurla. Tha an iomairt na com-pàirteachadh eadar Sabhal Mòr Ostaig agus Oilthighean Ghlaschu, Obar Dheathain, Dhùn Èideann agus Shrath Chluaidh.

Tha sinn an-dràsta a’ trusadh oifigear conaltraidh airson an sgioba aig am bi ròl cudromach ann a bhith a’ dèiligeadh ri conaltradh air an taobh a-muigh agus for-ruigheachd Fhaclair na Gàidhlig.

Bidh deagh cheum le urram agad (aig 2:1 co-dhiù) ann an Conaltradh no cuspair co-cheangailte ris, no bidh teisteanas/eòlas co-ionnan eile agad. Bidh thu comasach air obair ann an sgioba no gu neo-eisimeileach, agus bidh thu cleachdte ri obair sgrùdaidh agus ri dlùth-aire a thoirt air nithean mionaideach. Bidh eòlas agad air obair ann an eagrachadh Gàidhlig agus bidh thu sgileil an dà chuid ann an sgrìobhadh agus labhairt na Gàidhlig.

Tuarastal:  £30,380 pro rata (24.5 uair a thìde gach seachdain)

Teirm: Faodar tòiseachadh sa bhad. Tha maoineachadh ri fhaotainn gu 31 Màrt 2026, agus sìneadh an crochadh air maoineachadh a bharrachd

Àite-obrach: Ri cho-rèiteachadh. Bidh feum air cuairt a thoirt bho àm gu àm gu Ionad an Fhaclair ann an Sabhal Mòr Ostaig, san Eilean Sgitheanach.

Ceann-là dùnaidh: Dimàirt 9 Sultain 2025 aig 5f.

Iarrtasan: Airson pasgan iarrtais, a’ gabhail a-steach foirm iarrtais, cuiribh fios gu Sharon Pearson, Manaidsear an Ionaid, aig sp1.smo@uhi.ac.uk